UTS, SITKOM ta yega na akuerdo pa CAO nobo

Willemstad, febrüari 8, 2021 – E CAO pa empleadonan di UTS a keda firmá ofisialmente entre SITKOM i UTS riba djamars 2 di febrüari 2021

Mirando e situashon pa ku Covid-19, solamente un grupo chikitu ku a konsistí di tim di maneho di UTS, representantenan di SITKOM i otro miembronan di e tim di negoshashon, tabata presente pa e momento di firma.

“Mi ke yama danki na SITKOM pa e kolaborashon ku a duna i e manera profeshonal ku kua a atendé e negosiashonnan pa e CAO nobo aki,” tabata palabranan di señor Danny Macaya, Country Manager pa UTS, Karibe Hulandes.

E CAO nobo aki ta aplikabel pa empleadonan di UTS den teritorionan di Kòrsou, Boneiru i parti hulandes di St. Maarten.

“Nos a yega aserka nos miembronan den tur teritorionan pa presentá na nan e loke nos a negoshá i a logra pa nan, i nos ta kontentu ku e akuerdo aki,” tabata palabranan di señor Cedric Isei, Presidente di e sindikato SITKOM ku ta representá empleadonan di UTS.

E CAO nobo aki ta drenta na vigor ku fecha retroaktivo 1 di yanüari 2020 i ta konta te ku 31 di desèmber 2022.

 

»Return to Press Releases