Flow Trahando P’abo

Ku inisiativa pa un eksperensia di kliente na gran eskala rònt Kòrsou pa mehorashon di e ret i konfiabilidat di e servisio

 

WILLEMSTAD, Korsou (5 di mei, 2021) - Flow/UTS a lansa un esfuerso nashonal den kua téknikonan ta baiendo den barionan rònt e isla pa mehorá i elevá e konektividat di su klientenan i un mihó konfiabilidat general.

“Nos ta rekonosé ku durante e último lunanan algun kliente a eksperensiá difikultatnan ku e kalidat i provishon di nos servisionan. Esei no ta loke nos ta para p’e i nos sa ku nos por hasi mihó pa nos klientenan. P’esei, awe nos ta lansa nos kampaña i diferente inisiativanan tangibel ku lo sigurá ku nos klientenan tin akseso konfiabel na nos mundu digital via di nos liña fiho i ofertanan mobil. Esaki ta kuminsá ku e ‘dispatch’ di nos téknikonan rònt e isla pa rektifiká kualke difikultat ku konekshon den un término mas korto posibel. Nos ta ‘Trahando p’abo’, i nos dedikashon ta mas fuerte ku nunka,” tabata palabranan di Danny Macaya, Country Manager pa Flow/UTS Kòrsou.

Pa kuminsá e esfuersonan aki, durante e último 2 simannan, téknikonan a bin ta bishitá diferente barionan pa hasi mantenshon riba e ret i duna asistensia na klientenan ku por tin kualke difikultat tékniko. Esaki tabata un kombinashon di yega pro-aktivamente serka e klientenan di kua nan bario tabata na turno, i atendé preokupashonnan di klientenan ku a tuma kontakto ku Flow/UTS.

“Nos a bini ta monitoriá i revisá kada aspekto di nos ret i ta aseptá ku tin espasio pa mehorashon den sierto áreanan di nos isla. Kaminda ku nos tuma nota di defisiensia, nos ta tuma akshonnan konkreto i ta asigná téknikonan pa rápidamente hasi ahustenan nesesario i hasi mehorashon pa nos klientenan mesora. Nos prioridat number unu awe i despues ta pa proveé nos klientenan ku un ret mas stabil ku por dependé riba dje i ku nan ta konfia,” Macaya a añadí.

Téknikonan a bishitá kaba áreanan manera Janwe, St. Michiel, Jan Doret, Curasol, Seru Fortuna, Fortuna, Fortuna Abou, Kanga, Stenen Koraal i parti di Muizenberg, miéntras mas bario lo keda bishitá den transkurso di simannan benidero.

E kampaña ‘Working For You’, esta ‘Trahando P’abo’, ta parti di e kompania su kompromiso mas amplio pa instalá un ret konfiabel i proveé servisio optimal na kliente rònt e isla Kòrsou.

 

»Return to Press Releases